भैरहवा । सरकारका प्रवक्ता एवं शिक्षा तथा खेलकूदमन्त्री सस्मित पोखरेलले विद्यालय शिक्षा ऐन निर्माणको काम अघि बढिरहेको बताएको छ ।
शिक्षा विभागको आयोजनामा लुम्बिनी प्रदेशअन्तर्गतका एक सय नौ स्थानीय तहका शिक्षा शाखाका प्रतिनिधिका लागि आयोजित आर्थिक वर्ष २०८३/०८४ सम्बन्धि नीति, निर्देशिका, मापदण्ड तथा कार्यक्रम कार्यान्वयन कार्यविधिसम्बन्धी अभिमुखीकरण कार्यक्रमलाई सम्बोधन गर्दै मन्त्री पोखरेलले भविष्यलाई ध्यानमा राखेर वास्तविक धरातलमा आधारित र दीर्घकालीन प्रभाव पार्ने गरी ऐन ल्याइने बताए ।
उनले विद्यार्थी, शिक्षक, अभिभावक तथा अन्य सरोकारवालासँग छलफल गरी प्राप्त सुझावका आधारमा विद्यालय शिक्षा ऐन निर्माण गरिने जानकारी दिए ।
मन्त्री पोखरेलले शिक्षा क्षेत्रको नीतिगत सुधारका लागि विद्यालय शिक्षा ऐनसँगै राष्ट्रिय पाठ्यक्रम प्रारूप परिमार्जनको कामसमेत भइरहेको बताए ।
उनका अनुसार ऐन निर्माण र पाठ्यक्रम परिमार्जनको प्रक्रियाले नेपालको शिक्षा क्षेत्रको दीर्घकालीन रूपान्तरणमा सहयोग पुग्नेछ ।
कार्यक्रममा लुम्बिनी प्रदेशअन्तर्गतका एक सय नौ स्थानीय तहका शिक्षा शाखाका प्रतिनिधिको सहभागिता रहेको थियो ।
कार्यक्रममा शिक्षा क्षेत्रका नीति, निर्देशिका, मापदण्ड तथा कार्यक्रम कार्यान्वयनसम्बन्धी विषयमा अभिमुखीकरण तथा छलफल गरिएको थियो ।
