दाङ । शिक्षा तथा खेलकूदमन्त्री सस्मित पोखरेलले दाङको देउखुरीस्थित देउखुरी अन्तरराष्ट्रिय क्रिकेट रंगशालाको निरीक्षण गरेको छ ।
दसौँ राष्ट्रिय खेलकूद प्रतियोगितालाई लक्षित कार्यक्रमका लागि सुर्खेत जाने क्रममा मन्त्री पोखरेलले रंगशालाको अवलोकन तथा निरीक्षण गरेको हो ।
निरीक्षणका क्रममा उनले रंगशालामा क्रिकेट अभ्यास गरिरहेका युवाहरूसँग क्रिकेटसमेत खेलेका थिए ।
रंगशालाको अवस्था तथा खेलकूद गतिविधिबारे जानकारी लिन मन्त्री पोखरेल त्यहाँ पुगेका थिए । सो अवसरमा उनले स्थानीय खेलाडीहरूसँग अन्तरक्रियासमेत गरेका थिए ।
मन्त्री पोखरेलसँगै उनका प्रमुख सल्लाहकार शैलेन्द्र झासहित मन्त्रालयको उच्चस्तरीय टोली पनि रंगशाला निरीक्षणमा सहभागी भएको थियो ।
देउखुरी क्षेत्रमा क्रिकेट खेलको विकास र पूर्वाधार विस्तारका लागि महत्वपूर्ण मानिएको उक्त रंगशालाको निरीक्षणलाई स्थानी खेलाडी तथा खेलप्रेमीहरूले चासोका साथ हेरेका छन् ।
