काभ्रेपलाञ्चोक । धुलिखेल अस्पतालले एक सय शय्याको ट्रमा तथा इमरजेन्सी सेन्टर निर्माण गरिरहेको छ ।
नेपाल-जापान दुई देशबीचको सम्झौताअनुसार जापानको तीन दशमलव ८६ अर्ब जापानी येन (रु. तीन अर्ब ६० करोड) बराबरको पूर्ण अनुदानमा भवन निर्माण भइरहेको हो ।
पटक-पटकका सम्झौताबीच औपचारिकरूपमा २८ मे २०२५ मा भवन निर्माणार्थ शिलान्यास गरिएको थियो ।
द्रुत गतिमा अघि बढिरहेको ट्रमा तथा इमरजेन्सी सेन्टर नेपालका लागि महत्त्वपूर्ण स्वास्थ्य पूर्वाधार परियोजनाका रूपमा हेरिएको छ ।
अस्पताल परिसरमा निर्माणाधीन उक्त सेन्टरमा अरनिको राजमार्ग र बिपी राजमार्गबाट बिरामीको सहजै पहुँच पुग्नेछ ।
ट्रमा तथा इमरजेन्सी सेन्टर करिब १६ रोपनी क्षेत्रफलमा निर्माण भइरहेको निर्माण कम्पनीका इन्जिनियर रोशन श्रेष्ठले जानकारी दिए ।
उनका अनुसार भवनको कुल क्षेत्रफल करिब ७४ हजार वर्गफिट छ । भवनलाई विपद्, आगलागी तथा अन्य आकस्मिक अवस्थालाई पनि ध्यानमा राखेर सुरक्षित बनाउने गरी ‘डिजाइन’ गरिएको श्रेष्ठको भनाइ छ ।
भवनमा न्यूनतम तीन फिटदेखि दस फिटसम्मका पिल्लर प्रयोग गरिएको छ । निर्माण कार्यमा दैनिक करिब १४ घण्टा काम भइरहेको छ भने हाल करिब दुई सय ५० जना कामदार परिचालन गरिएको जनाइएको छ ।
परियोजनाको करिब ५० प्रतिशत निर्माण कार्य सम्पन्न भइसकेको जनाइएको छ ।
निर्माण कार्यका लागि जापानको टोडा कर्पोरेसन, टोकियो छनोट भएको थियो । जाइका नेपाल तथा स्वास्थ्य तथा खाद्य स्वच्छता मन्त्रालयका प्रतिनिधिको उपस्थितिमा सन् २०२५ अप्रिलबाट निर्माणको प्रारम्भिक काम शुरु गरिएको हो ।
परियोजनामा जापानी कम्पनी टोडासँगै नेपालको हिमालयन बिल्डर्स एन्ड इन्जिनियरिङलगायतका कम्पनीहरू पनि संलग्न रहेका छन् ।
निर्माण सम्पन्न भएपछि ट्रमा सेन्टरमा सिटी स्क्यान, एमआरआई, अत्याधुनिक शल्यक्रिया कक्ष, भेन्टिलेटर, एक्स–रे मेसिनलगायत आवश्यक स्वास्थ्य उपकरण जडान गरिने सेन्टरका फोकल पर्सन डा. दीपक श्रेष्ठले जानकारी दिए ।
उनका अनुसार अत्याधुनिक उपकरण तथा अस्पतालका शय्यासहितको संरचना सन् २०२७ जुनसम्म हस्तान्तरण गर्ने लक्ष्य राखिएको छ ।
सेन्टर सञ्चालनमा आएपछि काभ्रेपलाञ्चोकसँगै छिमेकी जिल्लाहरू रामेछाप, दोलखा, सिन्धुपाल्चोक, सिन्धुली र भक्तपुरका गम्भीर घाइते तथा आकस्मिक उपचार आवश्यक पर्ने बिरामीले तत्काल विशेषज्ञ सेवा पाउने छन् ।
बिपी राजमार्गसँग जोडिएका तराईका जिल्लाबाट आउने घाइते बिरामीका लागि पनि यो केन्द्र निकै महत्त्वपूर्ण हुने विश्वास गरिएको छ ।
अन्तरराष्ट्रियस्तरमा देखिएका असहज परिस्थिति, नेपालमा आएको बाढी तथा अन्य विपद् र जेनजी आन्दोलनका कारण निर्माण सामग्री आपूर्ति, जनशक्ति व्यवस्थापन तथा परियोजना सञ्चालनमा केही समस्या आए पनि काम पूर्णरूपमा प्रभावित नभएको अस्पतालले जनाएको छ ।
विक्रम संवत २०५३ देखि स्वास्थ्य सेवा शुरु गरेको धुलिखेल अस्पतालले तीन दशकको अवधिमा विभिन्न विशेषज्ञ तथा अत्याधुनिक सेवा थप गर्दै आएको जनाएको छ ।
नयाँ ट्रमा तथा इमरजेन्सी सेन्टर सञ्चालनमा आएपछि अस्पतालको आकस्मिक तथा जटिल चोटपटक उपचार क्षमतामा उल्लेख्य विस्तार हुने अपेक्षा गरिएको छ ।
