काठमाडौँ । आइतबार बिहान सिरिङ्गे हिमालमा गएको हिमपहिरोले उइन्गुलुङ खोला थुनिएर गोरखाको बुढीगण्डकी नदीमा आएको बाढीपछि खोजी, उद्धार, राहत तथा पुन:निर्माणका लागि सरकार तदारुकताका साथ लागिरहेको छ ।
प्रभावित क्षेत्रबाट १९ विदेशी नागरिकसहित तीन सय १४ जनाको उद्धार गरिएको छ । पाच जना स्थानीय सम्पर्कविहीन रहेकाले सुरक्षाकर्मीहरूले खोजी कार्य जारी राखेको छ ।
बाढीपछि अहिलेसम्म विपद् जोखिम न्यूनीकरण तथा व्यवस्थापन प्राधिकरणको समन्वयमा सात सय तीन जना सुरक्षाकर्मी परिचालन भएको छ ।
आरुघाट जलमापन केन्द्रमा नदीको सतह खतराको तह (५ मिटर) नाघेर ८.४३ मिटरसम्म पुगेको थियो ।
बाढीको सम्भावित जोखिमबाट सुरक्षित राख्न करिब दुई लाख नागरिकलाई पूर्वसूचना पठाउनुका साथै प्राधिकरणको कमान्ड पोस्टले तत्काल बैठक बसी अवस्थाको निरन्तर अनुगमन र उद्धार परिचालन शुरु गरेको थियो ।
बाढीले धादिङ र गोरखाका दुई सय भन्दा धेरै घरमा क्षति पुग्नुका साथै डेढ सय जति चौरीगाई तथा भेंडाबाख्रा बगाएको छ ।
खानेपानी, निर्माणाधीन जल विद्युत्, विद्यालयलगायतका संरचनासहित मनास्लु पदमार्ग र गोरखा–धादिङ जोड्ने मुख्य सडकका तीन पक्की पुल र दुई झोलुङ्गे पुलमा क्षति पुर्याएको छ ।
विपद्पछिको प्रतिकार्य तथा पुन:निर्माणमा पनि सरकार निरन्तर लागिरहेको छ । आज मात्रै काठमाडौंबाट हवाई साधनमार्फत गोरखाको फिलिममा चार हजार दुई सय ७० केजी खाद्यान्न र एक हजार नौन सय लिटर हवाई इन्धन ढुवानी गरी आपत्कालीन राहत वितरण अघि बढाइएको छ ।
अहिले आरुघाट–सल्यानटार जोड्ने पुल पुनः सञ्चालन गर्न हेटौँडाबाट बेलिब्रिजका सामग्री ल्याएर निर्माण कार्य तीव्र पारिएको छ भने छेपारे भीरमा एक्स्काभेटर परिचालन गरी दोभान–सल्लेरी सडक खुलाउने प्रयास भइरहेको छ ।
सरकारले दसैँअघि नै सम्पूर्ण अवरुद्ध सडकहरू सञ्चालनमा ल्याउने लक्ष्य राखेको छ ।
