म्याग्दी । अन्नपूर्ण गाउँपालिका–७ हिस्तान औलामा रु. छ करोडको लागतमा अस्पताल भवन निर्माण भएको छ । सघन शहरी विकास तथा भवन आयोजनाले पाँच शैय्याको अस्पताल भवन निर्माण गरेको हो ।
वडाध्यक्ष मइलन पुनका अनुसार औलामा रहेको स्वास्थ्यचौकीको भवन पहिरोको जोखिममा परेपछि नयाँ भवन निर्माण गरिएको हो ।
नयाँ भवनबाट चाँडै सेवा प्रवाह गर्ने तयारी भइरहेको छ । भवनमा कर्मचारी तथा स्वास्थ्यकर्मीका लागि आवासको व्यवस्था गरिएको छ ।
भवन निर्माणका निम्ति हर्कबहादुर गरबुजालगायत पाँच जना स्थानीयले पाँच रोपनी जग्गादान गरेका थिए ।
