स्याङ्जा । यहाँका दुई युवाले बाँझो रहेको जमिनको सदुपयोग गर्दै व्यावसायिक रूपमा अकबरे खुर्सानी खेती शुरु गरेका छन् ।
स्याङ्जाको भिरकोट नगरपालिका–९ सिर्कोट पिपलडाँडामा झन्डै ३० रोपनी क्षेत्रफलमा व्यावसायिक खुर्सानी खेती थालिएको हो ।
एक पटक लगाएपछि केही वर्षसम्म उत्पादन तथा आम्दानी लिन पाइने, बजार मूल्य राम्रो रहेको र बजारीकरणमा समस्या नभएकाले अकबरे खुर्सानी खेतीमा युवाको आकर्षण बढेको हो ।
तीन/चार वर्षअघिदेखि थोरै मात्रामा खुर्सानी खेती गर्दै आएकोमा उत्पादन राम्रो भएपछि व्यावसायिकरूपमा अगाडि बढेको किसान तनबहादुर गुरुङले बताए ।
वैदेशिक रोजगारीमा आठ वर्ष बिताएका गुरुङले आफ्नै गाउँठाउँमा केही गर्नुपर्छ भन्ने लागेर स्वदेश फर्किएसँगै खुर्सानी खेती थालेका हुन् ।
“विदेशमा बगाउने पसिना आफ्नै माटोमा बगाउन सकियो भने राम्रो हुने ठानेर स्वदेशमै खुर्सानी खेती गर्ने निधो गरेँ”, उनले भने, “जङ्गलैजङ्गल, बाँझो अनि पातीको झाडी फाडेर खुर्सानी लगाएका छौँ ।”
अहिलेसम्म झन्डै दस हजार बिरुवा लगाइसकेका गुरुङले यस वर्ष २० हजार बिरुवा खुर्सानी लगाउनका लागि जमिनको तयारी गरेका छन् । आफ्नै २० रोपनीका अलावा थप दस रोपनी जमिन भाडामा लिएका छन् ।
“गाउँबाट बसाइँ सरेर बजार जाने प्रवृत्तिकै कारण गाउँका घरहरू रित्तिँदै गए र जग्गा जमिन बाँझिन थाले”, उनले भने, “बाँझिएको जमिनको सदुपयोग गर्दै आम्दानीसित जोडिँदै गाउँमै बसेर पनि केही गर्न सकिन्छ है भन्ने उदाहरण खुर्सानीले दिनेमा म विश्वस्त छु ।”
गाउँघरमा प्रतिमाना रु. एक सय र प्रतिकेजी रु. तीन सय ५० का दरले बिक्री गर्न सकिने व्यावसायी कुमार गुरुङले बताए ।
खुर्सानीको माग अत्यधिक रहेकाले खुर्सानी बिक्रीबाट यस वर्ष करिब दस लाख आम्दानी गर्ने लक्ष्य उनको छ ।
खुर्सानी लगाउनका लागि जग्गा जमिन सम्याउने र बिरुवा लगाउने कार्यका लागि हाल आठ जनाले रोजगारी पाएका छन् ।
अन्य बाली लगाउँदा बाँदरलगायत जङ्गली जनावरले नष्ट गरिदिने भएकाले खुर्सानीलाई विकल्पका रूपमा अगाडि सारिएको हो ।
पछिल्लो समय भिरकोट नगरपालिकाले व्यावसायिक अकबरे खेती कार्यक्रमलाई कार्यान्वयनमा लगेको छ ।
भिरकोटको वडा नं. ९ मा झन्डै ९० रोपनी क्षेत्रफलमा व्यावसायिक खुर्सानी खेती थालिएको छ ।
विभिन्न समूह, सहकारी तथा व्यक्तिमार्फत वडामा झन्डै एक सय जना किसान खुर्सानी खेतीमा सहभागी भएका भिरकोट–९ का वडाध्यक्ष भीमबहादुर गुरुङले बताए ।
