दाङ । अधिकांशका लागि सामाजिक सञ्जाल युट्युब मनोरञ्जन र समय बिताउने माध्यम हो । तर दाङको तुलसीपुर उपमहानगरपालिका–१३ बखरियाकी सुलोचना शेर्पाले त्यही युट्युबलाई आफ्नो जीवन बदल्ने पाठशाला बनाएको छ ।
पाँच वर्षअघि मोबाइलको पर्दाबाट शुरु भएको सिकाइले आज उनलाई व्यावसायिक कागती कृषकका रूपमा स्थापित गरेको छ ।
कुनै औपचारिक तालिम नलिइ, कृषि विज्ञको ढोका नढकढक्याइ सुलोचनाले युट्युबमा उपलब्ध सामग्री हेरेरै कागतीखेतीका आधुनिक विधि सिकेको । त्यसपछि घरसँगै जोडिएको ११ कट्ठा जग्गामा तीन सयवटा कागतीका बिरुवा रोपेर व्यावसायिक खेती शुरु गरे ।
“मैले युट्युबबाट धेरै कुरा सिकेँ, त्यसबाट आत्मविश्वास बढ्यो र खेती शुरु गर्ने निर्णय गरेँ”, उनले भने ।
शुरुवाती वर्षमा उत्पादन कम भए पनि उनि निराश भएन । बोटको नियमित हेरचाह, सिँचाइ र प्राङ्गारिक मलको प्रयोगलाई निरन्तरता दिए । त्यसको प्रतिफलस्वरूप गत वर्ष सबै खर्च कटाएर करिब रु. एक लाख ५० हजार आम्दानी गर्न सफल भयो ।
यस वर्ष भने बगैँचाका अधिकांश बोट फलले लटरम्म छन् । उत्पादन बढेकाले आम्दानी रु. दुई लाखसम्म पुग्ने अपेक्षा उनको छ । “गत वर्षभन्दा यसपाली धेरै राम्रो फल लागेको छ, मेहनतको प्रतिफल देखिन थालेको छ”, उनले भने ।
अहिले उनले विभिन्न कृषिसम्बन्धी सङ्घ/संस्था र सरकारी निकायबाट पनि प्राविधिक सहयोग लिन थालेको छ ।
झोल मल, गोठे मल र गड्यौला मलको प्रयोग गरेर प्राङ्गारिक उत्पादनलाई प्राथमिकता दिइरहेको छ । यसले उत्पादनको गुणस्तर सुधारिनुका साथै लागत पनि घटेको उनको अनुभव छ ।
सुलोचनाको बुझाइमा अहिले सूचना र प्रविधिको पहुँच गाउँसम्म पुगेको छ । त्यसलाई मनोरञ्जनमा मात्र सीमित नराखी सीप सिक्ने माध्यमका रूपमा उपयोग गर्न सके आत्मनिर्भर बन्न सकिन्छ ।
उनको सफलताले आधुनिक प्रविधिको सही उपयोगले गाउँमै बसेर पनि रोजगारी र आम्दानीका नयाँ अवसर सिर्जना गर्न सकिन्छ भन्ने सन्देश दिएको छ ।
कुनै समय मनोरञ्जनका लागि चलाइएको मोबाइल आज उनका लागि खेतीको गुरु बनेको छ भने कागती बगैँचाले उनको जीवनमा आर्थिक आत्मनिर्भरताको नयाँ अध्याय लेखिदिएको छ ।
