काठमाडौँ । लोअर इर्खुवा हाइड्रो पावर कम्पनी लिमिटेडले छैठौं बार्षिक साधारणसभा सम्पन्न गरेको छ ।

मंगलबार बालुवाटार, काठमाडौँमा कम्पनीका अध्यक्ष कुमार पाण्डेको सभापतित्वमा सम्पन्न सो साधारणसभाले अध्यक्ष पाण्डेद्वारा प्रस्तुत कम्पनीको आव २०८०/०८१ को बार्षिक प्रतिबेदन पारित गरेको छ ।

लेखापरीक्षकको प्रतिबेदनसहित चालू आवको वासलात , नाफानोक्सान हिसाब , नगद प्रवाह विवरण तथा आव २०८१/०८२ को लागि लेखापरीक्षक नियुक्ति निजको पारिश्रमिक तोक्ने, शेयर सार्वजनिक निस्कासन गर्नेलगायतका प्रस्तावहरु साधारणसभामा पारित भएका छन ।

हाल कम्पनीको भू सतहमा निर्माणको काम ८८ प्रतिशत सम्पन्न भएको साधारणसभामा जानकारी दिइएको थियो भने सुरुङ खन्ने काम ९९ प्रतिशत, हाइड्रो मेकानिकल उपकरण जडान गर्ने काम ९० प्रतिशत सम्पन्न भएको र वैकल्पिक ३३ के.भी. लाइन निर्माण सुरु गर्ने कार्य समेत सम्पन्न भएको बताइएको छ ।

त्यसैगरी आव २०८०/०८१ को कुल ब्यवस्थापन खर्च २ करोड ५४ लाख ७० हजार ४९५ रहेको छ भने कार्यालय संचालन खर्च ६९ लाख ९० हजार ८८४ हुन गएको छ । कार्यालय कर्मचारी खर्च तर्फ १ करोड ८४ लाख ७९ हजार ६१० हुँदै गर्दा चालू आवमा कम्पनीको जलविद्युत आयोजनामा २ अर्व ७५ करोड ३६ लाख २५ हजार ७०० कुल खर्च भएको साधारणसभामा बताइएको थियो ।

यसैगरी यहि आर्थिक बर्ष भित्र विद्युतको व्यापारीक उत्पादन सुरु गर्ने लक्ष्य कम्पनीले लिएको छ । विविध कार्यक्रमको साथमा साधारणसभा सम्पन्न भएको थियो ।