सर्लाही । नेकपा (माओवादी केन्द्र)ले सुरु गरेको जनतासँग माओवादी, तराई-मधेस जागरण अभियान शुक्रबार सर्लाही जिल्लामा रहेको छ ।
फागुन १२ गते झापाको कचनकवलबाट सुरु भएको अभियान झापा, मोरङ, सुनसरी, सप्तरी, सिरहा, धनुषा, महोत्तरीहुँदै सर्लाही आएको हो । शुक्रबारै सर्लाहीका कार्यक्रम सकेर अभियान टोली रौतहट जाने छ ।
अभियानको जिल्ला बढ्दै गर्दा जनसहभागिता पनि बढ्दै गएको छ । विहान ६ बजे मर्निङ वाक गरेर सुरु गरिने अभियानका कार्यक्रम राति ९ बजेसम्म चल्ने गरेका छन् ।
अभियानको क्रममा सडकैभरि फूलमाला बोकेर उभिएका सयौं कार्यकर्ता र शुभेच्छुकले अध्यक्ष पुष्पकमल दाहाल 'प्रचण्ड'सहित नेताहरुलाई स्वागत गर्ने गरेका छन् ।
स्वागतमा सबै उमेर समूह र बढी महिलाहरु सडकमा आउने गरेका छन् ।
स्वागतपछि चोकचोकमा चोकसभा हुने गरेको छ भने एक जिल्लामा एक मुख्य सभा हुने गरेको छ ।
सर्लाहीमा प्रवेश गरेपछि हिजोदेखि विभिन्न स्थानमा माओवादी केन्द्र र नेपाल समाजवादी पार्टीका स्थानीय कमिटीहरुले संयुक्त स्वागत कार्यक्रम राखेका छन् । सो पार्टीका अध्यक्ष महेन्द्रराय यादव पनि अभियानमा सहभागी हुन्छन ।
हुलाकी मार्गमा पर्ने स्थानीय तहहरुले अभियान टोलीलाई स्वागत गरिरहेका छन् ।
जुन दलबाट जितेका जनप्रतिनिधि भए पनि पूर्वप्रधानमन्त्रीसहित देशका शीर्ष नेता गाउँमा आउनुलाई अवसरको रुपमा लिएर उनीहरुले स्वागत गर्ने गरेका छन् ।
अभियान टोलीले जनताकै घरमा सामूहिकरुपमा खाना खाने र बाँडिएर बस्ने गरेको छ । शुक्रबार सर्लाहीमा अभियान टोली विहानै पर्सा गाउँपालिकाको मुस्लिम वस्तीमा पुगेर रमजानको शुभकामना आदान-प्रदान गरेको थियो ।
त्यसपछि चन्द्रनगर, ब्रह्म्पुरी गाउँपालिकाका विभिन्न स्थानमा जनभेट्घाट, स्वागत र चोकसभा सप्पन्न भएका छन् भने मलङ्गवामा जनसभा हुँदैछ ।
