काठमाडौं । काठमाडौँ महानगरपालिकाले बाढीको जोखिममा रहेका तीन सय ९३ जनालाई सुरक्षित स्थानमा सारेको छ ।
अविरल वर्षापछि आएको बाढीले महानगर क्षेत्रका खोला किनारामा बस्दै आएका तीन सय ९३ जनालाई सुरक्षित स्थानमा सारिएको हो ।
महानगर प्रमुख बालेन्द्र शाहले हालसम्म बाढीको जोखिममा रहेका बस्तीका मानिसलाई चारवटा विद्यालयमा सारेको जानकारी दिएको छ ।
नगर प्रमुख शाहका अनुसार विश्व निकेतन माध्यमिक विद्यालय, त्रिपुरेश्वरमा ७० जना, गुह्येश्वरी माध्यिमक विद्यालय, सिनामङ्गगलमा ५२ जना, जन विकास माध्यमिक विद्यालयमा कुलेश्वरमा ५२ परिवारका दुई सय ५१ जना र महेन्द्र सरस्वती आधारभूत विद्यालय टेकुमा वीस जनालाई राखिएको छ ।
महानगरको शिक्षा विभागले महानगरभित्रका ७० वटा विद्यालयमा तत्कालका लागि आश्रयस्थल (सेल्टर)को व्यवस्था गर्न सकिने जनाएको छ । उद्धार गरिएकाहरूका लागि खाने र बस्ने व्यवस्था महानगरपालिकाले गरिरहेको छ । महानगरले कुनै समस्या परेमा १६६००१०५५११, ०१५९०१७६४, ०१५९०१७६३ मा सम्पर्क गर्न सबैलाई अनुरोध गरेको छ ।
