काठमाडौं । राष्ट्रिय समाचार समिति (रासस)का कार्यालय सहयोगी राजीनन साह ५८ वर्षे उमेरहदका कारण रासस सेवाबाट निवृत्त भएको छ ।
विसं २०५१ भदौ १९ गते सेवा प्रवेश गरेका उनले गत मंसिर मसान्तदेखि अवकाश पाएको हो ।
रासस केन्द्रीय कार्यालयमा शुक्रबार आयोजित कार्यक्रममा राससकर्मी साहको औपचारिक रुपमा बिदाइ गरियो । त्यस अवसरमा राससका कार्यकारी अध्यक्ष धर्मेन्द्र झाले अवकाशपछि जीवनलाई सहज र सिर्जनशील बनाउनेतर्फ नयाँ पाइला अघि बढाउन आग्रह गरे ।
“मानिसले जीवनको प्रत्येक क्षणको चुनौतीको सामना गर्न तयार हुनुपर्छ”, उनले थपे, “सेवामा रहँदाको सिकाइ र अनुभवका आधारमा अवकाशपछिको यात्रालाई सफल तुल्याउनुपर्छ ।”
राससका महाप्रबन्धक सन्दीप राईले जीवन्त संस्थामा नयाँ कर्मचारीको आगमन र पुरानाको बिदाइ स्वभाविक प्रक्रियाका रुपमा लिनुपर्ने बताए ।
“अवकाश भनेको विश्राम होइन, अर्को यात्राको शुरुवात हो, यसलाई अधिकतम् सदुपयोग गर्नुपर्छ ।”
अवकाशप्राप्त राससकर्मी साहले सेवामा रहँदा भए/गरेको तितामिठा अनुभव प्राप्त गर्नु स्वभाविक भएकाले नराम्रा पक्षलाई बिर्सनुपर्ने धारणा राखे । त्यस अवसरमा रासस केन्द्रीय कार्यालय, नेपाल पत्रकार महासंघ, रासस प्रतिष्ठान, नेपाल राष्ट्रिय कर्मचारी संगठन, रासस, रासस कर्मचारी युनियन र रासस कर्मचारी संघका तर्फबाट संयुक्तरुपमा मायाको चिनो प्रदान गरी विदाई गरेका थिए ।
