मुस्ताङ । हिमाली जिल्ला मुस्ताङमा दुर्लभ हिउँ चितुवाको सङ्ख्या पत्ता लगाउन अध्ययन शुरुवात गरिएको छ ।
बायोकोर्स नेपाल र अन्नपूर्ण संरक्षण क्षेत्र आयोजना, इलाका संरक्षण कार्यालय जोमसोमको संयुक्त समन्वय र सहकार्यमा यहाँका उच्चलेकमा हिउँ चितुवा सङ्ख्या एकिन गर्न क्यामेरा ट्यापिङमार्फत अध्ययन अनुसन्धान शुरु गरिएको हो ।
बायोकोर्स नेपाल र एक्याप मिलेर यहाँको वारागुङ मुक्तिक्षेत्र गाउँपालिका अन्तर्गतका उच्चलेकमा हिउँ चितुवाको सङ्ख्या एकिन गर्न, हिउँ चितुवाको आहारा प्रजातीको अवस्था र मानव र हिउँ चितुवाबीचको द्वन्द्वको अवस्था पहिल्याउन र जलवायु परिवर्तनका कारण हिउँ चितुवाको बासस्थान र विद्यमान अवस्थाको जानकारी लिने उद्देश्यले हिउँ चितुवाको अध्ययनअनुसन्धान गर्न क्यामेरा ट्ययापिङ शुरु गरिएको बायोकोर्स नेपालका फिल्ड बायोलोजिस्ट बुद्धिबहादुर गुरुङले जानकारी दिए ।
उनका अनुसार यहाँको वारागुङ मुक्तिक्षेत्रको झोङ, पुडाक, छेङ्गुर, थोरङ्फेदी, फल्याक, धार्काजुङ र मुस्ताङ-डोल्पा सडकको उच्चलेकमा १५ थान क्यामेरा जडान गरिएको बताए ।
यहाँको घरपझोङ गाउँपालिकाअन्तर्गत स्याङ, मार्फा र चिमाङ गाउँको उच्चलेकमा हिउँ चितुवा ट्यापिङका लागि थप क्यामेरा जडान गरिने कार्यक्रम रहेको उनले जानकारी दिए ।
यहाँका उच्चलेकमा हिउँ चितुवाको विस्तृत अध्ययनअनुसन्धान गर्न बायोकोर्सका प्रतिनिधि बायोलोजिस्ट गुरुङ र असिस्टेन प्रविन लामा क्यामेरा जडानकार्यमा खटिएका छन् ।
यसैगरी एक्याप जोमसोमबाट प्राकृतिक स्रोत संरक्षण सहायक दिपक ओली खटिनु भएको हो ।
बायोकोर्स र एक्यापका प्राविधिक टोलीले यहाँका उच्चलेकमा हिउँ चितुवाको सम्भावित बासस्थान क्षेत्रमा पुगेर क्यामेरा जडान गरेका हुन ।
यहाँका सम्भावित हिउँ चितुवा बासस्थान क्षेत्रलाई केन्द्रित गरी राखिएका ट्ययापिङ क्यामेरा दुई महिनासम्म लेकमा राखिने छन् । हिउँद याममा हिउँ चितुवाको सङ्ख्या एकिन गर्न र हिउँ चितुवाको गतिविधि थाहा पाउँन क्यामेरा जडान गरिएको हो ।
बायोकोर्सका प्रतिनिधि बायोलोजिस्ट गुरुङले दुई महिनापछि उच्चलेकमा राखिएका क्यामेराको डाटा सर्वेक्षण गरिने जानकारी दिए ।
“दुई महिनापछि क्यामेरा झिकेर ल्याउँछौँ, सफ्वेयर अपडेट गरी हिउँ चितुवाको विस्तृत विवरण सङ्कलन हुन्छ, प्रतिनिधि गुरुङले भने,‘ क्यामेरामा कैद भएका डाटा सबै एक्यापलाईनै हस्तान्तरण हुन्छ, हामीले हिउँ चितुवाको एकिन मात्रै गर्छौ” बायोकोर्स नेपालले अन्नपूर्ण संरक्षण क्षेत्र आयोजनाको विभिन्न क्षेत्रमा हिउँ चितुवाको अध्ययन गर्न क्यामेरा ट्यापिङलगायतका कार्य गर्दैआईरहेको प्रतिनिधि गुरुङको भनाइ छ ।
मुख्य रुपमा नाउर अध्ययनका लागि कार्य गरिने भए पनि बायोकार्सले त्यसको साथ-साथैमा हिउँ चितुवाकोसमेत अध्ययन गर्ने गरेको जनाएको छ ।
सन् २०२२ देखि लगातार मनाङमा चार वर्षसम्म निरन्तर हिउँ चितुवाको अध्ययन गर्न क्यामेरा ट्ययापिङ गर्ने गरिएकोमा यसपाली मुस्ताङमा यस प्रकारको कार्यक्रम पहिलो भएको बायोलोजिस्ट गुरुङले जानकारी दिए ।
यसैगरी माथिल्लो मुस्ताङमा पनि एक हिउँ चितुवासम्बन्धी विद्यावारिधि विद्यार्थीले क्यामेरा ट्ययापिङमार्फत हिउँको अध्ययन शुरु गरेको एक्याप लोमान्थाङका प्रमुख उमेश पौडेलले बताए ।
मुस्ताङमा पटक-पटक हिउँ चितुवा अध्ययनका लागि क्यामेरा ट्ययापिङलगायतको काम भए पनि हालसम्म कतिको सङ्ख्यामा हिउँ चितुवा छन् भन्ने तथ्य एकिन हुन सकिरहेको छैन ।
पछिल्लो समय मुस्ताङमा हिउँ चितुवा र मानवबीचको द्वन्द्व बढेको देखिन्छ । हिउँ चितुवा उच्चलेक छाडेर सडक र बस्तीमा झर्ने र यहाँका पशुपालकको गोठमै पसेर पशुचौपायालगायतलाई क्षति पुर्याउने घटना दोहोरिरहेका छन् ।
पछिल्लो समय जलवायु परिवर्तनका कारण उच्चलेकमा चरनक्षेत्रमा घाँस पलाउन छाडेको र पानीको स्रोत सुक्दै जान थालेपछि हिउँ चितुवाको आहारा नाउर खोला र बस्तीसम्म झर्ने गरेको पाइएको छ ।
हिउँ चितुवा नाउरलगायतका आहारा पछ्याउँदै खोला र बस्तीमा झर्दा मानव र हिउँ चितुवाबीचको द्वन्द्व बढेको हो ।
यहाँ हिउँ चितुवाको संरक्षण र मानवबीचको सहअस्तित्व निर्माण गर्नसमेत चुनौती बढदै गइरहेको छ ।
यसैगरी कम उचाइको क्षेत्रमा रहने चितुवा (कमन लियापार्ट) पनि तापक्रम वृद्धि हुँदै जाँदा माथि-माथि बासस्थान सार्नेलगायतका घटना पनि देखिन थालेका छन् ।
