काठमाडौं । सुपरमाई हाइड्रोपावर लिमिटेडको एघारौँ वार्षिक साधारणसभा हालै सम्पन्न भएको छ ।
काठमाडौँ, नक्सालमा कम्पनीका अध्यक्ष बुद्धिबहादुर थापाको सभापतित्वमा सम्पन्न सो साधारणसभाले सञ्चालक समितिको तर्फबाट अध्यक्ष थापाद्वारा प्रस्तुत कम्पनीको आ.व. २०८१/०८२ को वार्षिक प्रतिवेदन पारित गरेको छ ।
साधारणसभाले आ.व. २०८१/०८२ को लेखा परीक्षण प्रतिवेदनको साथमा वासलात, नाफा / नोक्सान हिसाब, नगद प्रवाह विवरण पारित गरेको छ भने आ.व. २०८२/०८३ को लेखा परीक्षक नियुक्ति तथा निजको पारिश्रमिक तोक्ने सम्बन्धसमेत पारित गरेको छ ।
यसैगरी साधारणसभामा विभिन्न विशेष प्रस्तावहरू पनि पारित भएका छन् ।
साधारणसभाले संचालक समितिले सिफारिस गरे बमोजिम रु. ५९,२७,९७७।८९ नगद लाभांश वितरण गर्ने निर्णय गरेको छ । चुक्ता पूँजीको २०% को दरले अर्थात् १०७०००० कित्ता शेयर प्रति कित्ता रु. १०० को दरले हुने कुल रु. १०,७०,००,०००।०० बोनस शेयर वितरण गर्ने प्रस्तावसमेत साधारणसभाले पारित गरेको छ ।
साधारण सभामा बताइएअनुसार हाल कम्पनीको रु. ५७,९७,००,०००।०० सावा ऋण तिर्न बाँकी रहेको छ भने यस आ.व.मा कम्पनीले रु. ११,००,००,०००।०० सावा ऋण चुक्ता गरेको छ ।
वि.सं. २०८२ मा कम्पनीको शेयर पूँजी रु.५३,५०,००,०००।०० भइ जगेडा रु.१२,७८,०६,९०७।०० रहन गएको छ भने विद्युत बिक्रीबाट प्राप्त आम्दानी रु. १९,८६,९८,२८०।०० भएको छ ।
साधारणसभामा शेयरधनीहरूद्वारा उठाइएका विभिन्न सवालहरूको जवाफ अध्यक्ष थापा तथा कम्पनीका अन्य पदाधिकारीहरूले दिएका थिए । यसै बीच विभिन्न कार्यक्रमका साथमा साधारणसभा सम्पन्न भएको थियो ।
इलाम जिल्लाको माईखोलामा अवस्थित ७.८ मेगावाट सुपरमाई हाइड्रोपावर आयोजना वि.सं. २०७५ कार्तिकबाट व्यावसायिकरूपमा सञ्चालन भइरहेको समेत आयोजित साधारणसभामा जानकारी गराइएको थियो ।
