म्याग्दी । म्याग्दीको सदरमुकाम बेनीमा दाताको सहयोग जुटाएर आँखा उपचार केन्द्रको भवन निर्माण शुरु भएको छ ।
नेपाल नेत्रज्योति संघ म्याग्दीले बेनी नगरपालिका–८ कालीपुलमा आँखा उपचार केन्द्रको भवन निर्माण शुरु गरेको हो ।
रु. एक करोड तीन लाखको लागतमा तीन तले भवन निर्माण गर्न लागिएको संघका अध्यक्ष अमर बानियाँले जानकारी दिए ।
“संस्थाका पदाधिकारी र सदस्यहरूबाट जुटाएको रु. दस लाख बजेटबाट जग खन्ने र कुनातिर पर्खाल बनाउन थालेका छौँ,” उनले भने, “थप पूर्वाधार बनाउन दाताहरूलाई सहयोगको अपिल गरेका छौँ ।”
मालिका–६ दिच्यामका मुक्ति रोका र उनकी पत्नी याममायाले रु. दुई करोड ५० लाख मूल्य बराबरको सात आना, एक पैसा, तीन दाम क्षेत्रफल भएको जग्गा उपलब्ध गराएका छन् । रोका सामाजिक व्यक्तित्व हुन् ।
दुई तलामा कार्यालय र सहयोगी कक्ष रहने भवनको पहिलो तलामा उपचार तथा औषधि भण्डारण र दोस्रोमा शल्यक्रिया कक्ष बनाइने सभापति बानियाँले जानकारी दिए ।
संघले हाल बेनीमा भाडाको घरमा सञ्चालन गरेको आँखा उपचार कक्षको भवनबाट म्याग्दीका साथै पर्वत, मुस्ताङ र बागलुङका बासिन्दाले सेवा लिने गरेका छन् ।
भवन सम्पन्न भएपछि आँखाको शल्यक्रिया सम्बन्धी सेवा बेनीमै उपलब्ध गराउने र पोखरा जानुपर्ने समस्या हटाउने उद्देश्य राखिएको सभापति बानियाँले बताए ।
