काठमाडौँ । चिकित्सा शिक्षा आयोगले चालु शैक्षिक सत्रका लागि चिकित्सा शिक्षाका विभिन्न कार्यक्रममा कुल चार सय १८ सिट वृद्धि गर्ने निर्णय गरेको छ ।
प्रधानमन्त्री बालेन्द्र शाहको अध्यक्षतामा बसेको चिकित्सा शिक्षा आयोगको बैठकले शैक्षिक सत्र २०८३-०८४ का लागि कुल नौ हजार छ सय ९१ सिट निर्धारण गर्दै सो निर्णय गरेको हो । यो सङ्ख्या गत वर्षभन्दा चार सय १८ ले बढी हो ।
सिट निर्धारण प्रक्रियाका लागि देशभरका कुल ९० वटा शिक्षण संस्थाले स्व-मूल्याङ्कन फाराम भरेर सिट माग गरेका थिए ।
विज्ञान तथा प्रविधिसहितको टोलीले गरेको अनुगमनको प्रतिवेदनलाई आधार बनाएर ९० मध्ये ८४ वटा शिक्षण संस्थालाई यस वर्ष सिट निर्धारण गरिएको छ ।
आयोगका सदस्य सचिव हरिप्रसाद निरौलाका अनुसार, कार्यक्रमगत हिसाबले एमबीबीएसतर्फ गत वर्षको तुलनामा कुल एक सय दस सिट वृद्धि गरिएको छ ।
जसअन्तर्गत सहिद दशरथ चन्द स्वास्थ्य विज्ञान विश्वविद्यालयले एमबीबीएसका लागि ५० सिट प्राप्त गरेको छ ।
यसैगरी बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा ३०-३० सिट थप गरिएको छ ।
'निजी मेडिकल कलेजको हकमा भने यस वर्ष सिट वृद्धि गरिएको छैन । एमबीबीएसमा बढेको सिट सरकारी संस्थाको मात्र हो,' सदस्य सचिव निरौलाले बताए ।
उनका अनुसार, एमबीबीएसबाहेक अन्य विधामा पनि सिट बढाएको छ ।
बिएससी नर्सिङतर्फ गत वर्षको तुलनामा दुई सय सय दस सिट वृद्धि गरिएको छ भने बिएमएसमा ९८ सिट थप गरिएको छ ।
