दमाैली । तनहुँको ऋषिङ गाउँपालिकाको आयोजनामा आजदेखि दोस्रो ऋषिङ अध्यक्ष कप भलिबल प्रतियोगिता सुरु भएको छ । झापुटारमा सुरु भएको सो प्रतियोगिताको उद्घाटन खेलमा आयोजक ऋषिङ गाउँपालिका ‘बि’ विजयी भएको छ । ऋषिङ ‘बि’ले म्याग्दे गाउँपालिकालाई ३–० ले पराजित गरेको हो ।
ऋषिङ गाउँपालिकाका प्रवक्ता विजय दरैका अनुसार उक्त प्रतियोगितामा तनहुँको व्यास नगरपालिका, भिमाद र शुक्लागण्डकी नगरपालिका, म्याग्दे, आँबुखैरेनी र घिरिङ गाउँपालिका, स्याङ्जाको बिरुवा गाउँपालिका, पुतलीबजार नगरपालिका र अर्जुनचौपारी गाउँपालिका, कास्कीको मादी गाउँपालिका र रुपाकोट गाउँपालिका, बाग्लुङको गलकोट नगरपालिका तथा नवलपुरको बौदीकाली गाउँपालिका सहभागी छन् ।
आइतबार चार खेल सञ्चालन हुने दरैले बताउनुभयो । विकाससँगै खेलकुदका गतिविधिलाई अगाडी बढाउने उद्देश्यले आयोजना गरिएको प्रतियोगिता मङ्सिर २२ गतेसम्म सञ्चालन हुनेछ । प्रतियोगितामा प्रथम, द्वितीय र तृतीयलाई क्रमशः रु एक लाख ४० हजार, रु एक लाख र रु ६० हजारसहित शिल्ड, मेडल र प्रमाणपत्र प्रदान गरिनेछ । उत्कृष्ट खेलाडीलाई पनि नगद पुरस्कारको व्यवस्था गरिएको आयोजकले जनाएको छ ।
