काठमाडाैं । राष्ट्रिय प्रजातन्त्र पार्टीको अध्यक्षमा युवा नेता राजेन्द्र लिङ्देन विजयी भएका छन् । उनले अध्यक्षका प्रत्यासी कमल थापालाई भारी मतान्तरले पराजित गरेका छन् ।
आइतबार बिहान सम्पन्न मतगणनाबाट थापालाई २२७ मतले हराउँदै लिङ्देन विजयी भएका हुन् । निर्वाचन समितिका संयोजक हरिबहादुर बस्नेतले लिङ्देन १ हजार ८४४ मतका साथ विजयी भएको जानकारी दिए । यस्तै पराजित थापाले १ हजार ६१७ मत ल्याए । मतगणनामा ४३१ मत बदर भएको थियाे।
अध्यक्षमा थापा पराजित भए पनि पदाधिकारीमा थापापक्षका अधिकांश उम्मेदवार विजयी भएका छन् । खुल्ला उपाध्यक्षमा विक्रम पाण्डे सर्वाधिक मत ल्याएर विजयी भएका छन्। दुवै प्यानलबाट उपाध्यक्षमा परेका थिए । पाण्डेले २ हजार ५२१ मत पाएका छन्।
महामन्त्रीमा धवलशम्शेर राणा विजयी भएका छन् । उनी लिङ्देन पक्षबाट महामन्त्रीमा उठेका थिए । उनले २ हजार २२१ मत ल्याए । राणा नेपालगन्ज उपमहानगर पालिकाका प्रमुख हुन् ।
महिला महामन्त्रीतर्फ थापा समूहकी कुन्तीकुमारी शाही विजयी भइन् । उनले २ हजार ८ मत ल्याइन् । महिला महामन्त्रीमा लिङ्देन समूहकी रेखा थापाले १ हजार ६४० मत ल्याएर पराजित भइन्।
