बर्दिया । बर्दियाको गुलरिया नगरपालिकाको छ हजार हेक्टर क्षेत्रफलमा सिँचाइ सुविधा पुर्याउन नहर निर्माण गर्न थालिएको छ । बबई सिँचाइ आयोजनाअन्तर्गत पश्चिमी नहर सदरमुकामसम्म पुर्याउने आयोजनाको लक्ष्य छ ।
गुलरिया नगरपालिका–१ र ३ को सिमाना निमकोठियाबाट चार किलोमिटर लामो नहर निर्माण गर्न लागिएको बबई सिँचाइ आयोजनाका प्रमुख सुशीलचन्द देवकोटाले बताए ।
विसं २०४५ देखि सुरू भएको सो आयोजनाले २०८३ सालसम्म बर्दियाका छ पालिकाको ३६ हजार हेक्टर क्षेत्रफलमा सिँचाइ सुविधा पुर्याउने लक्ष्य छ ।
गुलरिया नगरपालिकाअन्तर्गत छ हजार हेक्टर भूमि सिँचाइ गर्न नहर शिलान्यास गरिएको छ । गुलरियाका किसान आकाशेपानीको भरमा खेती गर्नुपर्ने पीडाबाट अबको तीन वर्षपछि मुक्त हुने प्रमुख देवकोटाले बताए । “किसानले लगाएको बालीबाट अब कम खर्चमा उब्जनी बढ्ने छ”, उनले जानकारी दिए ।
सदरमुकाम गुलरियासम्म पुर्याउने मूलनहर चार किलोमिटर र शाखा नहर ११ किलोमिटर निर्माण गर्न रु ८३ करोड बजेट छ । नगरक्षेत्रमा नहर निर्माण हुने भएपछि गुलरियाका किसान खुसी भएका छन् ।
नदीको पानी खेतखेतमा पुगेपछि पर्याप्त उब्जनी हुने र सिँचाइमा हुने लगानी घट्ने गुलरिया नगरपालिकाका नगरप्रमुख मुक्तिनाथ यादव बताउछ ।
नहर शिलान्यास गर्दै उनले पानीको उचित व्यवस्थापन गर्न आयोजनासँग आग्रह गरे । यसअघि सिँचाइ सुविधा नहुँदा गुलरियाका किसान महँगो शुल्क तिरेर सिँचाइ गर्दै आएका थिए ।
बबई सिँचाइ आयोजनाले ३४ किलोमिटर पूर्वी मूल नहर र ४१ किलोमिटर पश्चिमी नहर निर्माण गर्ने लक्ष्य लिएको छ ।
