म्याग्दी । मालिका गाउँपालिका–३ लुक्सीपारमा ‘एक घर, एक धारा’ कार्यक्रमअन्तर्गत रु. ३९ लाख २३ हजारको लागतमा खानेपानी आयोजना निर्माण सम्पन्न भएको छ । आयोजनाबाट करिब चार सय जना लाभान्वित भएका छन् ।
नेपाल स्वास्थ्यका लागि पानी (नेवा) को रु. १७ लाख ७४ हजार सात सय २९, मालिका गाउँपालिकाको रु. नौ लाख ९५ हजार पाच सय नौ र उपभोक्ताको रु. ११ लाख ५३ हजार दुई सय ५० बराबरको श्रमदानमा आयोजना सम्पन्न भएको नेवाका प्राविधिक रुपक थापाले जानकारी दिए ।
मालिका गाउँपालिका र नेवाको साझेदारीमा चालु आर्थिक वर्ष २०८१/०८२ मा मालिका गाउँपालिका–३ मा पात्ले, लुक्सीपार र डाँडागाउँमा तीनवटा खानेपानी योजना निर्माण भएका छन् ।
ती योजनाहरुबाट चार सय परिवार लाभान्वित भएका वडाध्यक्ष मोतीप्रसाद बुढाले बताए ।
डाँडागाउँ, किटेनी, औल, सराग्दी, स्यागलुङ, पात्ले र लुक्सीपार टोलमा खानेपानी सुविधा विस्तार भएको उनले जानकारी दिए ।
