म्याग्दी । म्याग्दीको अन्नपूर्ण गाउँपालिका–५ पाउद्वारमा खेलमैदान निर्माण भएको छ ।
अन्नपूर्ण गाउँपालिकाको सहयोगमा खयरभारानी युवा क्लवले पाउद्वारमा खेलमैदान निर्माण भएको हो । उपभोक्ता समितिका सचिव भविन पाइजाले पाखोबारी सम्माएर खेलमैदान निर्माण गरिएको जानकारी दिए ।
अन्नपूर्ण गाउँपालिकाको रु. २१ लाख ५० हजार बजेटबाट पाखोबारी सम्माएर ८५ मिटर लम्बाई र ३० मिटर चौडाइको खेलमैदान निर्माण गरिएको बताए । “विद्यालयको खेलमैदानमा खेलअभ्यास र प्रतियोगिता सञ्चालन गर्दा पठन-पाठनमा समस्या भएपछि नयाँ ठाउँमा जग्गा खोजेर खेलमैदान निर्माण गरिएको हो,” उनले भने “पोखोबारी सम्माएर खेलमैदान बनाएका हौँ ।”
डोजर परिचालन गरेर सम्माइएको खेलमैदानको डिलतर्फ ग्यावियन पर्खाल निर्माण र बल छेक्न तारजाली निर्माण गरिएको छ ।
खेलमैदान निर्माण गर्न स्थानीय रामकृष्ण तिलिजाले रु. दुई लाख २० हजार बराबरको एक आना जग्गा दान गरेको छ । रु. छ लाख ६० हजार मूल्य बराबरको थप तीन रोपनी जग्गा खरिद गरिएका थिए ।
खेलमैदान निर्माणका लागि पाउद्वारका एक सय ३५ घरपरिवारले एक/एक दिनका दरले श्रमदान गरेको छ ।
क्लवमा आवद्ध युवाले पनि योजना निर्माणमा श्रमदान गरेको छ । खेलमैदानमा स्टेज, प्याराफिट, सार्वजनिक शौचालयलगायतका पूर्वाधार तयार गर्न बाँकी छन् ।
खेलमैदान निर्माण भएपछि पाउद्वारका युवायुवतीलाई खेलअभ्यास गर्न र प्रतियोगिता सञ्चालन गर्न सहज भएको छ ।
