भोजपुर । यहाँको षडानन्द नगरपालिका-१० रिठ्ठाबोटमा रहेको चण्डिका आधारभूत विद्यालयलाई घेराबार गरिएपछि पठन-पाठनमा सहजता भएको छ ।
एकान्तमा रहेको विद्यालयमा पशुचौपाया तथा मानिसहरुले उपद्रो गर्दा विद्यालयमा क्षति पुग्दै आएको अवस्थामा घेराबार गरिएपछि सहजता भएको हो ।
विद्यालय क्षेत्रमा पशुचौपाया चराउन ल्याउदा पठन-पाठनमा असहजता भइरहेको अवस्थामा घेराबारले सहजता भएको विद्यालयका प्रधानाध्यापक परशुराम काफ्ले बताउँछन् ।
मुलबाटो छेउको विद्यालय भएकोले घेराबार भएपछि विद्यालय सञ्चालनमा सहजता भएको उनको भनाइ छ ।
नजिककै हाटबजार लाग्ने भएकोले मादक पदार्थ खाएर मानिसहरु प्रबेश गरिदिँदा धेरै समस्या रहेकोमा अहिले सहजता भएको उनको भनाइ छ ।
“विद्यालयको घेराबार नहुँदा धेरै समस्या थियो” उनले भने ,“विद्यालयको चौरमा गाइबस्तु पसिदिँदा विद्यार्थीलाई अभ्यासमूलक शिक्षणमा समस्या हुन्थ्यो । विद्यालयमा अनावश्यक मानिसहरुको प्रवेश हुँदा शिक्षण सिकाइमा असर पुगेको अवस्था थियो । घेराबार भएपछि विद्यालयको भौतिक सम्पतिको सुरक्षासँगै पठन-पाठनमा सहजता छ ।”
घेराबार नहुँदा विद्यालय सञ्चालनमा समस्या भएपछि वडाले रु. दुई लाख बजेट विनियोजन गरेर घेराबार लगाएको वडाध्यक्ष पेमदोर्ची शेर्पाले बताए ।
विद्यालयसँगै विद्यार्थीको सुरक्षाको लागि अन्य कामलाई थाती राखेर विद्यालयको घेराबार गरिएको उनको भनाइ छ ।
“वडामा सीमित बजेट हुन्छ” वडाध्यक्ष शेर्पाले भने, “स्थानीयको माग धेरै छ । घेराबार नहुँदा विद्यालय सञ्चालनमा समस्या भएपछि अन्य कामलाई थाती राखेर यो काम गरेका हौँ । घेराबार गरिएपछि विद्यालय सञ्चालनमा सहजता भएको छ ।”
वडाले स्थानीयको माग र आवश्यकताको आधारमा विकासका कामलाई अघि बढाएको उनको भनाइ छ । वडाको काममा पारदर्शिता ल्याउन वर्षभरि सञ्चालन भएको काम र भावी दिनमा हुन लागेका योजनालाई स्थानीय भेला गरेर सार्वजनिक सुनुवाइमार्फत जानकारी दिँदै आएको उनको भनाइ छ ।
