कैलाली । वनस्पती अनुसन्धान केन्द्र, कैलालीअन्तर्गत रहेको देवहरिया वनस्पति उद्यान, धनगढीले किसानलाई जडीबुटीका बिरुवा वितरणसँगै तालिम पनि दिएको छ ।
व्यावसायिकरुपमा जडीबुटी खेती गर्न इच्छुक किसान तथा व्यक्तिगत प्रयोजनको लागि बिरुवा रोप्ने व्यक्तिलाई आर्थिक वर्ष २०८१/०८२ मा ८१ हजार दुई सय ४२ वटा विभिन्न प्रजातिका जडीबुटीका बिरुवा वितरण गरेको वनस्पति अनुसन्धान केन्द्र कार्यालयका प्रमुख गङ्गादत्त भट्टले जानकारी दिए । जसमा चिउँरी, नीम, तेजपात, शीतल चिनी, कुरिलोलगायत बोटबिरुवा रहेका छन् ।
अनुसन्धान केन्द्रले वार्षिक ५० हजार विभिन्न प्रजातिका जडीबुटीका विरुवा उत्पादन गर्ने लक्ष्य भए पनि लक्ष्यभन्दा बढी बिरुवा वितरण गरिरहेको उनको भनाइ छ ।
केन्द्रले मापदण्ड बनाएर प्रत्येक आर्थिक वर्षमा जडीबुटीका बिरुवा वितरण गर्दै आएको छ भने प्रदेशमा जडीबुटी खेती विस्तार सम्बन्धी तालिम दिँदै आएको छ ।
गत आर्थिक वर्षमा कैलालीको चुरे गाउँपालिका-३ मा २९ जना र वडा नं. ४ को गर्भामा २५ जना गरी जम्मा ५४ जनालाई जडीबुटी खेती सम्बन्धी तालिम दिएको कार्यालय प्रमुख भट्टले जानकारी दिए ।
त्यस्तै कैलाली र कञ्चनपुरका पाँचवटा जडीबुटी समूह सहकारीहरुलाई सम्बन्धी तालिम दिएको छ ।
तालिम दिने क्षेत्रमा पाइने जडीबुटीको अवस्था के छ, खेती गर्न सकिन्छ की सकिदैन, त्यसको सम्भावना के छ, माटोको उर्बरा शक्ति कस्तो छ, अध्ययन गरी पहिचान गरेर मात्रै तालिमको तय हुने गरेको उनले जानकारी दिए ।
कार्यालयले अघिल्लो आ.व. २०८०/०८१ मा बाजुराको बुढीगङ्गा र अछामको मेल्लेखमा त्यहाँ उत्पादन हुने जडीबुटीको पहिचान गरी ६० जनालाई जडीबुटी खेती विस्तार सम्बन्धी तालिम दिएका थिए ।
यी क्षेत्रमा रिठ्ठा उत्पादन हुने गरेको र अछामको रामारोशनमा सतुवा, डालेचुक उत्पादन हुन्छ सोहीलाई आधार बनाएर तालिम दिने गरेको छ ।
गत आ.व.मा करिब दस हजार चिउरीका बिरुवा उत्पादन गरिएकोमा त्यसमध्ये सात हजार नौ सय बिरुवा वितरण गरी चुरे क्षेत्रका सामुदायिक वनमा रोपी सकेको उनले बताए ।
चिउरीको फूल माहुरीका लागि लाभदायिक हुन्छ भने यसको दानाबाट घ्यू उत्पादन गर्न सकिन्छ । जडीबुटीखेती गर्ने समूह सहकारीलाई अनुसन्धान केन्द्रले अनुदानको व्यवस्था पनि गर्दै आएको कार्यालय प्रमुख भट्ट बताउँछन् ।
प्राकृतिक हराभरा भएको वनस्पति अनुसन्धान केन्द्रअन्तर्गत देवहरिया वनस्पति उद्यान १४९.५ हेक्टर क्षेत्रफलमा फैलिएको छ ।
यसभित्र जखौर, मुरफुट्टा र मुरफुट्टी गरी तीनवटा प्राकृतिक तालहरु रहेका छन् । पर्यटक, पर्यावरणीय हिसाबले यो उद्यानको छुट्टै महत्व छ ।
