गोरखा । जनतासँग माओवादी मध्यपहाडी (पुष्पलाल लोकमार्ग) जनजागरण अभियानका क्रममा नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ नेतृत्वको टोली सिरानचोक गाउँपालिका–खहरेमा पुगेको छ । अभियान टोलीलाई स्थानीय बासिन्दाले भव्य स्वागत गरेका छन् ।
सिरानचोक गाउँपालिका–खहरेमा जनतासँग अन्तरक्रिया सम्पन्न भएको छ ।
नेताहरूको उपस्थितिमा गरिएको अन्तरक्रिया कार्यक्रममा स्थानीयका प्रश्नहरू सुनिसकेपछि कार्यक्रमलाई सम्बोधन गर्दै अध्यक्ष प्रचण्डले माओवादी आन्दोलनले अझै सम्पूर्ण क्रान्ति जित्न बाँकी रहेको बताए ।
उनले भने, “हामीले पुरै क्रान्ति जितेका होइनौं । यदि हामीले सरकार एक्लै चलाएका भए अझ धेरै काम गर्न सकिन्थ्यो, तर हामीले सधैं अरूसँग मिलेर सरकार सञ्चालन गरेका हौं ।”
अध्यक्ष दाहालले जनयुद्धको क्रममा गोरखाले दिएको ठूलो साथ र योगदानलाई स्मरण गर्दै यस क्षेत्रको विकासका लागि विशेष प्राथमिकताका योजना अघि सारिएको जानकारी दिए ।
उनले मध्यपहाडी लोकमार्गले गोरखाको जीवनस्तरमा देखिएको परिवर्तनलाई उदाहरणका रुपमा प्रस्तुत गर्दै भने, “पहिलो पटक प्रधानमन्त्री हुँदा पनि हाम्रो सरकार एकलौटी थिएन, तर पनि हामीले मध्यपहाडी लोकमार्ग, हुलाकी मार्ग र उत्तर–दक्षिण करिडोरको निर्माणलाई अगाडि बढाएका थियौं ।”
अध्यक्ष प्रचण्डले स्थानीय नेताहरूलाई सरकार र पार्टीले गरेका उपलब्धिहरू जनतासामु पुर्याउने जिम्मेवारीमा ध्यान दिनुपर्नेमा जोड दिए ।
“हामीले पहिलो, दोस्रो र तेस्रो पटक सरकारमा रहँदा गरेका काम स्थानीय नेताले जनतालाई भन्नैपर्छ,” प्रचण्डको भनाइ थियो ।
सुशासन र सामाजिक न्यायको पक्षमा दृढतापूर्वक काम गर्दै गर्दा आफूलाई बिचौलियाको सेटिङका कारण सरकारबाट हटाइएको अनुभव भएको प्रचण्डले आफ्ना मतदाता समक्ष पस्किए ।
अध्यक्ष दाहालले भने, “हामीले राम्रो काम गर्दै गर्दा, सुशासन र सामाजिक न्यायलाई अघि बढाउँदै गर्दा बिचौलियाको सेटिङमा सरकारबाट हटाइयो ।”
