भोजपुर । यहाँको पौवादुङमा गाउँपालिका–२ सोसेटारका देउमान राईले व्यावसायिक अकबरे खुर्सानीखेती गरिरहेको छ । उनले २५ रोपनी क्षेत्रमा खुर्सानी खेती गरेको छ ।
आठ वर्षअघिदेखि खुर्सानीखेती गरिरहेका राईले यो वर्ष १७ हजार बोट हारहारीमा खुर्सानी रोपेको छ ।
“आफ्नै ठाउँमा केही गरौँ भन्ने लक्ष्यका साथ खुर्सानीखेतीमा लागेको छु”, उनले भने, “यो वर्ष २५ रोपनी क्षेत्रमा खुर्सानी विस्तार गरेको छु ।” युवाहरुमा विदेशप्रतिको मोह बढिरहेको अवस्थामा आफ्नै बारीमा व्यावसायिकरुपमा कृषि कर्म गरिरहेको उनले बताए ।
व्यावसायिक योजनाका आधारमा पौवादुङमा गाउँपालिकाले ५० प्रतिशत अनुदानमा मल्चिङ प्लाष्टिक दिएकोले थप सहज भएको उनको भनाइ छ । उनले फार्ममा दुई जनालाई रोजगारीसमेत दिएको छ ।
सडकको पहुँच भएकोले उत्पादन भएको खुर्सानी घरबाटै बिक्री गर्न सकिने उनले बताए । देउमान मात्र नभएर गाउँपालिकाका अन्य सयौँले खुर्सानीखेती गरिरहेको छ ।
किसानको व्यावसायिक योजनाका आधारमा आवश्यक सहयोग गरिरहेको पौवादुङमा गाउँपालिकाका अध्यक्ष किरण राईले बताए ।
गाउँपालिकाले कृषि एम्बुलेन्स खरिद गरेर यहाँ उत्पादन भएका कृषिउपजको बजारीकरण गरिरहेको उनको भनाइ छ ।
खुर्सानीखेती विस्तारका लागि गाउँपालिकाले गत आर्थिक वर्षमा साच सय ५० किसानलाई रु. ७० लाख बढिको मल्चिङ प्लाष्टिकलगायतका कृषि सामग्री वितरण गरेको जनाएको छ ।
गाउँपालिकाले प्रोत्साहनका कार्यक्रम सञ्चालन गरेसँगै गत वर्ष खुर्सानीबाट रु. १८ करोड हाराहारीमा रकम पौवादुङ्मा भित्रिएको उनले जानकारी दिए ।
यहाँको करिब पाच सय हेक्टर क्षेत्रका आठ सय किसानले खुर्सानीखेती गरिरहेका छन् ।
गाउँपालिकाका उपाध्यक्ष ज्योत्सना राईका अनुसार यहाँका किसानले उत्पादन गरेको खुसार्नी स्थानीय बजारसँगै ठेकेदारमार्फत धरान, इटहरी, विराटनगर, काठमाडौँलगायतका शहरमा पुग्ने गरेको छ ।
