बागलुङ । यस वर्ष बागलुङबाट रु. ५४ लाख बराबरको छुर्पी निर्यात भएको छ । दूध र दुग्धजन्य पदार्थको बिक्री वितरण गर्दै आएको बागलुङ दुग्ध उत्पादक सहकारी सङ्घले आर्थिक वर्ष २०८१/०८२ मा रु. ५४ लाख ८८ हजार दुई सय ४० बराबरको निर्यात गरेको सङ्घका अध्यक्ष दिपक गौतमले बताए ।
अध्यक्ष गौतमका अनुसार बागलुङमा उत्पादित अधिकांश छुर्पी अमेरिका पुग्ने गरेको छ । अमेरिकामा कुकुरको मुख्य खानाका रूपमा रहेको छुर्पी नेपालबाट ठूलो मात्रामा निर्यात हुने गरेको छ ।
आ.व. २०८०/०८१ रु. ३८ लाख ५४ हजार बराबरको छुर्पी बिक्री गरेको सहकारीले अघिल्लो वर्षको तुलनामा यस वर्ष रु. १६ लाखभन्दा बढीको छुर्पी बिक्री गरेको छ ।
दुग्ध सहकारीले यस वर्ष रु. दस करोड ९९ लाख १७ हजार आठ सय ५५ बराबरको दूध र दुग्धजन्य वस्तुको कारोबार गरेको छ ।
उनका अनुसार सहकारीबाट दूध, दही, घ्यू, पनिर, छुर्पी र खुवाको उत्पादन हुँदै आएको छ ।
त्यसमध्ये अन्तरराष्ट्रिय बजारमा सहकारीको छुर्पीको माग उच्च छ । छुर्पीको माग बढेपछि सङ्घले एक वर्षमा रु. १६ लाखको छुर्पी उत्पादनमा वृद्धि गरेको हो ।
दुग्ध सहकारी सङ्घले बागलुङका १५ सहकारी संस्थाको दूध सङ्कलन गरेर दूध र दुग्धजन्य वस्तुको बिक्री गर्दै आएका छन् ।
जसमा एक हजार पाच सय भन्दा बढी किसान आबद्ध छन् । हाल सहकारी सङ्घले छुर्पी प्रतिकिलो रु. एक हजार दुई सयमा बिक्री गर्दै आएको छ ।
सहकारीमा आबद्ध किसानले दूधको मूल्यमा समानता र बजारको सुनिश्चिता भएकोले हौसला मिलेको बताएका छन् ।
सहकारी सङ्घमा १७ कर्मचारीले सङ्कलित दूध बागलुङ बजारका घर-घरमै लगेर बिक्री गर्ने गरेको अध्यक्ष गौतमले बताए ।
यस्तै आ.व. २०७९/०८० मा रु. २९ लाखको छुर्पी निर्यात गर्न सफल भएको थियो ।
