भोजपुर । यहाँको पौवादुङमा गाउँपालिका–४ बस्तिमका ४० वर्षीय नवराज घिमिरेले व्यावसायिकरूपमा कागतीखेती गरेर मनग्य आम्दानी गर्दै आएको छ । घिमिरेले कागती बिक्रीबाट वार्षिक रु. तीन लाखसम्म आम्दानी हुने बताए ।
अहिले उनले करिब दस रोपनी क्षेत्रमा साना-ठूला गरी तीन सय ५० बोट कागती रोपेको छ । “व्यावसायिकरूपमा कागतीखेतीमा लागेको छु”, उनले भने, “अहिले वार्षिक दुईदेखि तीन लाख रुपैयाँ आम्दानी लिँदै आएको छु । साना बिरुवा पनि विस्तार गरेको छु । ती हुर्किएपछि आम्दानी अझ बढ्नेछ ।”
छ वर्षअघिबाट फलफूलखेती शुरु गरेका घिमिरेले कागतीसँगै सुन्तला र एभोकाडोको पनि खेती विस्तार गरेको छ । एक पटक विस्तार गरेपछि लामो समयसम्म आम्दानी लिन सकिने भएकोले बहुवर्षीय बालीखेतीमा जोड दिएको उनको भनाइ छ ।
“एक पटक विस्तार गरेपछि दिर्घकालसम्म आम्दानी लिन सकिने बहुवर्षीय बाली खेती विस्तारमा जोड दिएको छु”, उनले भने, “कागतीसँगै सुन्तला, एभोकाडोको पनि खेती गरिरहेको छु ।”
फलफूलखेतीका लागि माटो र हावापानी उपयुक्त भएकोले पौवादुङमामा बहुवर्षीय खेती प्रणालीमा किसान आकर्षित भइरहेको गाउँपालिका अध्यक्ष किरण राईले बताए ।
उनका अनुसार गाउँपालिकाले ‘एक घर, एक फलफूल’ कार्यक्रम सञ्चालन गरेर फलफूल खेतीमा लगानी गर्दै आएको छ ।
“पौवादुङमामा माटो सुहाउँदो खेती प्रणालीमा जोड दिएका छौँ”, अध्यक्ष राईले भने, “यहाँ धेरै किसान बहुवर्षीय खेती प्रणालीमा जुटेका छन् । गाउँपालिकाले पनि आवश्यक प्रोत्साहन र सहयोग गर्दै आएको छ ।”
गाउँपालिका उपाध्यक्ष ज्योत्सना राईले बहुवर्षीय खेती प्रणालीबाट किसानले दिगोरूपमा आम्दानी लिनसक्ने भएकोले आवश्यक सहयोग गर्दै आएको बताइन् ।
किसानलाई भूगोलअनुसारको खेती प्रविधिमा जोड दिइएको उनको भनाइ छ । “वडागतरूपमा उत्पादन सम्भावना पहिचान गरेर विभिन्न जातका फलफूलखेतीमा प्रोत्साहन दिइरहेका छौँ”, उनले बताइन् ।
