दाङ । घोराही उपमहानगरपालिका–१६ तेरौटेका प्रतिकराज लोहनीले प्राङ्गारिक विधिमा आधारित भएर व्यावसायिकरूपमा कागतीखेती गरेर नमूना किसानको परिचय बनाएको छ ।
रासायनिक विषादी प्रयोग नगरी खेतीमा लागेका सिभिल इन्जिनियर उनले यसमा रु. एक करोड लगानी गरिसकेको छ । चार बिघा दस कट्ठाबाट खेती शुरु गरेका ४१ वर्षीय लोहनीले यसलाई छ बिघा विस्तार गरेको छ ।
उद्यमी लोहनीले सञ्चालन गरेको बगैँचामा ‘सुन कागती–१’ जातका करिब दुई हजारभन्दा बढी बिरुवा रोपिएका छन् ।
उनी भन्छन्, “सुन कागतीको बिरुवाले सामान्यतया रोपेको तीन वर्षदेखि उत्पादन दिने गर्दछ । हाल कागती जिल्लाको घोराही बजारसँगै काठमाडौं पनि पठाउने गरेको छ ।”
बगैँचामा दस जनाले रोजगारी पाएका छन् । खेती बढाउने सोचमा रहेका उनले प्रतिकट्ठा वार्षिक रु. तीन हजार तिर्ने गरेको बताए । उनले थोपा सिँचाइ प्रविधि प्रयोग गरेको छ । तेरौटे गाउँलाई ‘ग्रिन भिलेज’का रूपमा विकास गर्ने उनको लक्ष्य छ ।
काठमाडौँमा अध्यापनसँगै हाइड्रोपावर कम्पनीमा सेवा गरेका उद्यमी लोहनीले भने, “सागसब्जीका तुलनामा कागतीमा रोग सङ्क्रमणको डर कम हुने र उत्पादन पनि अधिक हुने भएकाले कागतीखेतीमा लागेको हुँ ।”
गत वर्ष प्रतिकिलो रु. एक सय ५० सम्म मूल्य पाएको कागती यस वर्ष रु. ८० मा झरे पनि खेतीप्रति निराश हुनुपर्ने अवस्था नरहेको उनी बताउँछन् ।
