बैतडी । बैतडीका महिला व्यावसायिकरूपमा बेसारखेती गर्न थालेका छन् । बिगतमा घरयासी प्रयोजनका लागि मात्रै बेसारखेती गर्दै आएका यहाँका महिला अहिले व्यावसायिकरूपमा बेसारखेती गर्न थालेका हुन् ।
खाद्यबाली जङ्गली जनावरले क्षति पुर्याउन थालेपछि बेसारखेती गरिरहेको पाटन नगरपालिका–६ की कलसा लुहारले बताइन् ।
“बाँदरले अन्य बालीमा क्षति पुर्याउन थाल्यो । बाँझो जमिनको सदुपयोग गर्दै व्यावसाहिकरूपमा अघि बढ्न बेसारखेती गरिरहेका छौँ”, उनले भनिन् ।
जिल्लाको पाटन नगरपालिका, सिगास र सुर्नया गाउँपालिकाका महिला उद्यमी समूहमा आवद्ध ४४ महिलाले बेसारखेती गरिरहेका छन् ।
घरका लागि मात्रै बेसार उत्पादन गर्दै आएकामा अहिले व्यावसायिकरूपमा खेती गर्न थालेका सुर्नया गाउँपालिका–६ की पवित्रा शाहले बताइन् ।
‘सारथी नेपाल’ले ‘दिगो आम्दानीमार्फत महिला उद्यमीको सशक्तीकरण’ परियोजनाअन्तर्गत बीउ र प्राविधिक सहयोग गरेपछि बेसारसँगै लसुनखेतीसमेत गरिरहेको उनले जानकारी दिए ।
सारथी नेपालले पाटन नगरपालिका–६, ८ र ९, सिगास गाउँपालिका–१ र २ तथा सुर्नया गाउँपालिका–६ उक्त परियोजना सञ्चालन गरेको छ ।
परियोजनामार्फत महिला उद्यमी समूहमा आवद्ध महिला किसानलाई बीउ र प्राविधिक सहयोग गर्दै आएको परियोजनाका फिल्ड सुपरभाइजर दिपेश धामीले बताए ।
बाँझो जमिनको सदुपयोग गरी महिलालाई व्यवसायसँग जोडेर आत्मनिर्भर बनाउन सारथी नेपालले बीउबिजन तथा अन्य सहयोग गर्दै आएको छ ।
परियोजनाअन्तर्गत महिलाले बेसारसँगै अदुवा, लसुन र टनेलभित्र गोलभेँडाखेतीसमेत गरिरहेको कार्यक्रम संयोजक भुपाल बोहराले जानकारी दिए ।
“महिलाले राम्रै मेहनत गरिरहेको छ । साढे तीन सय क्विन्टल बेसार उत्पादन हुने अपेक्षा गरेका छौँ”, उनले भने, “बेला-बेला प्राविधिकसहित बारीमा पुगेर समस्याबारे छलफल गर्छौँ र समाधान पनि खोज्छौँ ।”
