काठमाडाैं । स्वास्थ्य तथा जनसंख्या मन्त्री विराेध खतिवडाले आगामी फागुन १ गतेदेखि सबै नागरिकलाई काेराेनाविरूद्धकाे बुस्टर डाेज दिने बताएका छन् । मन्त्रालयकाे जिम्मेवारी सम्हालेकाे १०० दिनकाे प्रगति सार्वजनिक गर्दै उनले १८ वर्षदेखि माथिका सबै नागरिकलाई बुस्टर डाेज दिइने बताए ।
‘खोप सल्लाहकार समितिबाट १८ वर्ष उमेर पुगेका सबै नागरिक र दोस्रो डोज लगाएको ६ महिना पुगेकोलाई बुस्टर डोज लगाउन दिने निर्णय भएको छ ’, उनले भने, ‘फागुन १ देखि सबै नागरिकले बुस्टर डोज लगाउन सक्नेछन् ।’ अग्रपंक्तिमा खटिइनेलाई बुस्टर डाेज लगाउन प्राथमिकतामा राखिएकाे उनकाे भनाइ छ ।
चिकित्सकहरूले कोरोना संक्रमण भएका व्यक्तिले संक्रमणमुक्त भएको एक महिनापछि कोरोना भाइरसविरुद्धको खोप र खाेपकाे दुवै मात्रा पूरा गरेकाे ६ महिनापछि बुस्टर डोज लिन सक्ने बताएका छन् ।
