काठमाडौं । मुलुककै ठूलो सूचना प्रविधिसम्बन्धी प्रदर्शनी क्यान इन्फोटेक २०२३ को टिकेटिङ पार्टनर पेवेल नेपाल रहेको छ । कम्युटर एशोसिएसन नेपाल (क्यान)को संयोजनमा आयोजित क्यान इन्फोटेक यही माघ २४ देखि माघ २९ गतेसम्म काठमाडौंको भृकुटीमण्डपमा हुनेछ ।
क्यान इन्फोटेक मेलामा प्रवेशका लागि पेवेल नेपाल एपबाट टिकट काट्न सकिनेछ । यसका लागि प्लेस्टोर वा एप स्टोरबाट पेवेल एप डाउनलोड गर्न सकिनेछ । टिकेट काट्नका लागि पेवेल नेपालको एकाउन्ट (केवाइसी) भेरिफाइड भएको हुनुपर्नेछ ।
मेलामा भौतिकरुपमा उपस्थित भएर टिकट काट्दा प्रतिटिकट रू १०० लाग्ने छ । विद्यार्थीलाई ५० प्रतिशत छुट छ । पेवेल एपबाट टिकट काटेमा प्रतिटिकट रु २५ मात्र लाग्ने कम्पनीले जनाएको छ ।
पेवेल नेपाल एपबाट मोबाइल, टेलिफोन, इन्टरनेट, बिजुली तथा खानेपानी, फोहरको महसुल तिर्न, आन्तरिक हवाइ टिकट, बसको टिकट, विभिन्न विद्यालय तथा कलेजको शुल्क भुक्तानी गर्न सकिनेछ ।
विभिन्न क्षेत्रको बिल भुक्तानी गर्न, विभिन्न ठाउँबाट पठाएको पैसा प्राप्त गर्न तथा पठाउन, विभिन्न बैंक तथा वित्तीय संस्थामा रकम ट्रान्सफर गर्न, अनलाइनबाट खरिद गरिएको सामग्रीको भुक्तानी गर्न सकिनेछ । पेवेल वालेटमा विभिन्न बैंक तथा वित्तीय संस्थाको मोबाइल एप, इन्टरनेट बैंकिङ तथा कनेक्ट आइपिएसबाट रकम राख्न सकिनेछ ।
