चितवन । संयुक्त अरब इमिरेट्स (साउदी)मा ११ वर्ष काम गरेर फर्केका गैँडाकोटका एक युवाले घरमै कालिजपालन गरेर मासिक रु. एक लाख बढी आम्दानी गर्दै आएको छ ।
गैँडाकोट नगरपालिका–६ का प्रेमप्रसाद सापकोटाले साउदीबाट फर्किएपछि कालिजपालन शुरु गरेको हो । छ वर्षअघि नेपाल फर्किएर करिब एक कट्ठा जमिनमा उनले कालीजपालन शुरु गरेको थियो । रु. १३ लाख लागतमा उनले सो व्यवसाय शुरु गरेका थिए ।
शुरुमा प्रतिगोटा रु. दुई हजारमा अण्डा किनेर आफ्नै मेसिनबाट कोरलेर पालन गरेका सापकोटाले हाल आफैँ चल्ला बिक्री गर्छन् ।
एउटा चल्ला रु. दुई सयमा बिक्री हुने गरेको छ भने वार्षिक करिब दस हजार चल्ला बिक्री हुने गरेको उनले बताए ।
पूर्वको झापादेखि पश्चिमको धनगढीसम्म चल्ला बिक्री हुने गरेको छ । पालिएका माउ कालिज प्रतिगोटा रु. दुई हजारदेखि तीन हजारसम्ममा बिक्री हुन्छन् ।
मासुका लागि पनि उनको फार्मबाट कालिज बिक्री हुने गर्दछ । खानाका सौखिनहरूले फार्ममै आएर कालिज लैजाने गर्दछन् । वार्षिक पाच सय भन्दा बढी कालिज मासुका लागि बिक्री हुने गरेको छ ।
चल्ला र माउ बिक्रीबाट राम्रो आम्दानी हुने गरेको छ । घरकै उत्पादन गहुँ, मकै, घाँस र थोरै किनिएको दाना कालिजलाई खुवाउने गरिएको छ ।
सापकोटा बिहान–बेलुका कालिजलाई खाना दिन्छ भने दिउँसो अन्य काममा लाग्छन् । घर परिवारले व्यवसायमा सहयोग गर्दै आएका छन् ।
सापकोटाले भने, “साउदीमा जति कमाइ गरेँ, गाउँमै कालिजपालनबाट हुने आम्दानी त्यसभन्दा राम्रो छ । यसले मलाई छुट्टै काम गर्ने अवसर पनि दिएको छ र मेहनत गरे विदेशमा भन्दा बढी लाभ देशमै लिन सकिन्छ ।”
